Sonte në emisionin “Këndi i Debatit” në Tëvë1 ku është duke u diskutuar për zgjedhjet lokale të 12 tetorit dhe kandidatët që garojnë për kryetar të Prishtinës, analistët në studio kanë dhënë mendimin e tyre se kush sipas tyre e fiton kryeqytetin.
Politologia, Arta Tahiri-Beqa mendon që në balotazh domosdoshmërisht do të shkojnë kandidati i Lidhjes Demokratike të Kosovës dhe ai i Partisë Demokratike të Kosovës.
Konsulenti politik, Xhevdet Pozhari ka thënë se në balotazh i sheh Lidhjen Demokratike të Kosovës dhe Lëvizjen Vetëvendosje.
Të njëjtin mendim me Pozharin ka ndarë edhe Tomor Avdija nga A2CNN.
Nga ana tjetër, politologu, Albinot Maloku ka refuzuar të jap një mendim duke u shprehur se qytetari do të ishte mirë të bënte ndryshim.
Ndërkaq, Kenan Gashi nga Avonet ka vlerësuar se do të zhvillohet fushatë e ashpër mes tre kandidatëve dhe surpriza mund të jetë që Përparim Rama mund të rrezikohet shumë seriozisht në raport me Çekun dhe Uranin.
“Nëse Urani vazhdon me zhvillu një model ndryshe me afër qytetarëve do të jetë një prej kombinimeve më të mira që do ta ketë mundësinë që të jetë në ballotazh me cilido Ramën apo Çekun”, ka thënë Gashi.
