Kryetari i Lidhjes Demokratike të Kosovës, Lumir Abdixhiku, ka nderuar veprimtarin e vrarë pas luftës, Shaban Manaj, duke vendosur fotografinë e tij në “Këndin e Kujtesës” brenda selisë së LDK-së.
Në një ceremoni të mbajtur në praninë e familjarëve, miqve dhe bashkëpunëtorëve, Abdixhiku tha se Manaj është tashmë pjesë e panteonit politik të LDK-së përkrah figurave si Enveri, Xhema, Ismeti dhe Nekibja.
“Në 25-vjetorin e vrasjes së tij, përkujtimi për Shabanin mbetet i gjallë. Ai ishte avokat i shquar, veprimtar i palodhur dhe bashkëpunëtor i afërt i Presidentit Rugova. Me guxim, urtësi e përkushtim, Shaban Manaj la gjurmë të thella në rrugëtimin tonë për liri dhe ndërtim të shtetit”, ka thënë Abdixhiku.
Kreu i LDK-së ka theksuar se ende nuk është bërë drejtësi për këtë dhe shumë vrasje të tjera politike pas luftës në Kosovë.
“Familjarët ende kërkojnë drejtësi. Shoqëria jonë ka detyrim të përhershëm – zbardhjen e këtij krimi dhe të gjitha vrasjeve politike pas luftës. Zonjës Fatmushe, Fortesës, Shkodranit e Shkëmbit u themi të qëndrojnë të fortë edhe një çerek shekulli pas. Lavdi jetës dhe veprës së Shaban Manajt! Lavdi të gjithë veprimtarëve të lirisë!”, përfundoi ai.
