Avokati Arbër Jashari ka kujtuar 15-vjetorin e opinionit këshillëdhënës të Gjykatës Ndërkombëtare të Drejtësisë (GJND), i cili më 22 korrik 2010 konstatoi se shpallja e pavarësisë së Kosovës nuk bie ndesh me të drejtën ndërkombëtare.
Në një reagim publik, Jashari e ka cilësuar këtë opinion si një nga fitoret më të mëdha juridike dhe diplomatike të Kosovës.
“Sot u bënë 15 vjet që e drejta ndërkombëtare foli qartë dhe bindshëm në favor të shtetësisë së Republikës së Kosovës. Opinioni i GJND-së ishte i padiskutueshëm: pavarësia e Kosovës ishte në përputhje të plotë me të drejtën ndërkombëtare dhe me rezolutat relevante të OKB-së”, tha ai.
Sipas Jasharit, ky opinion ua ka rrëzuar argumentin kryesor vendeve që nuk e kanë njohur ende Kosovën – atë të paqenësisë juridike të shpalljes së pavarësisë.
Ai ka kërkuar nga institucionet e Kosovës që ta përdorin më fuqishëm këtë vendim si një mjet të fuqishëm në lobimin ndërkombëtar dhe për rritjen e numrit të njohjeve të reja.
“Ky është një xhevahir juridik që duhet të shfrytëzohet më shumë nga institucionet tona në arenën ndërkombëtare”, ka përfunduar Jashari.
