Në seancën e 51-të për konstituimin e Kuvendit të Kosovës, ka ndodhur një përplasje verbale mes kryesuesit të seancës, Avni Dehari, dhe deputetes së PDK-së, Ganimete Musliu, e cila çoi në ndërprerjen e seancës.
Gjatë seancës, Musliu u ftua të japë propozimin për përbërjen e Komisionit Zgjedhor ad-hoc, por në vend të kësaj, ajo nisi të mbajë një fjalim politik, pa e bërë propozimin e kërkuar.
Kjo shkaktoi reagimin e kryesuesit Dehari, i cili i kërkoi të rikthehej në temën e rendit të ditës.
“Nuk ndalohet debati, por po keqpërdoret foltorja”, tha Dehari, duke e kritikuar mënyrën se si Musliu po e përdorte kohën e fjalës.
Musliu reagoi menjëherë, duke kërkuar të mos i ndalet mikrofoni. Ajo iu afrua kryesuesit Dehari në foltore dhe nuk e lejoi as atë të flasë, duke tensionuar situatën në sallë.
Përplasja mes tyre u bë shkak që seanca të ndërpritej, duke shtuar edhe më tej pasigurinë në procesin e konstituimit të Kuvendit, i cili po vazhdon të zvarritet prej disa javësh.
