Gazetari, Florent Zeqiraj e ka cilësuar të vonuar kërkesën për sqarim rreth situatës pas kalimit të afatit kushtetues prej 30 ditësh për konstituimin e Kuvendit të Kosovës, të cilën presidentja, Vjosa Osmani ia ka drejtuar Gjykatës Kushtetuese.
Në emisionin “Këndi i Debatit” në Tëvë1, Zeqiraj ka thënë se vonesa është e qëllimshme për shkak se sipas tij, asnjërës nga subjektet politike aktualisht nuk iu konvenon të ketë qeveri.
“Osmani është vonuar shumë për shkak se kur ka dalë vendimi i Gjykatës Kushtetuese me afat për 30 ditë e kam thënë se është vetëm mjegull. Po besoj se 99 për qind është vonesë e qëllimshme për shkak se as PDK-së, as LDK-së, as VV-së e as AAK-së në këtë kohë nuk iu konvenon me pas qeveri për shkak se e kemi një datë të caktuar të zgjedhjeve lokale dhe të gjitha subjektet kapacitetin e tyre e kanë vendosur kah zgjedhjet lokale”, ka thënë ai në emisionin “Këndi I Debatit” në Tëvë1.
Tutje, Zeqiraj është shprehur se Osmani është vetëm një “turiste në politikë” që i ka shfrytëzuar mirë axhendat dhe interesat e saj.
“Presidentja aspak nuk e ka luajtur rolin i cili i takon. Unë mund ta them se Osmani është një turiste në politikë. I ka shfrytëzuar mirë axhendat dhe interesat e saj prej LDK-së. Ne e kemi ditur se Osmani nuk është lidere që e unifikon spektrin politik në Kosovë për shkak se ashtu ka filluar në politikë, ka filluar me përçarje dhe në njëfarë forme nuk është se zëri i saj është shumë i besueshëm as te Albin Kurti, as te partitë opozitare”, ka deklaruar Zeqiraj.
