Grupi palestinez, Hamas ka lëshuar deklaratë pas përkeqësimit të krizës humanitare në Gaza dhe shtimit të vdekjeve nga uria në Rrip.
Ai ka thënë se ka ardhur koha për të “thyer kufizimet” dhe për të lejuar më shumë ndihma të hyjnë në Gaza, mes urisë së përhapur dhe kequshqyerjes.
Në një deklaratë, Hamas u shpreh i befasuar nga “heshtja” e vendeve arabe dhe islame përballë “gjenocidit sistematik dhe urisë kriminale” në enklavë.
“Ne theksojmë se reagimet dhe qëndrimet zyrtare nuk i përgjigjen nivelit të katastrofës me të cilën po përballen dy milionë e një çerek njerëz.
Heshtja shurdhuese e sundimtarëve të kombit tonë inkurajon kriminelin e luftës Netanyahu të vazhdojë politikën e tij të urisë dhe gjenocidit,” thuhet në deklaratën e grupit palestinez, transmeton Al Jazeera.
“Populli ynë po vdes nga uria, ndërsa mijëra kamionë ndihmash janë grumbulluar në anën egjiptiane të pikës kufitare Rafah. Ne u bëjmë thirrje vendeve arabe dhe islame të ndërpresin çdo marrëdhënie me entitetin fashist të okupimit dhe të dëbojnë ambasadorët sionistë,” tha Hamas, duke kërkuar fundin e çdo forme të normalizimit me Izraelin.
