Presidentja e Kosovës, Vjosa Osmani, në një konferencë për media, ka bërë të ditur se ka paraqitur një kërkesë të dytë në Gjykatën Kushtetuese, që përfshin edhe kërkesën për masë të përkohshme, me qëllim të pezullimit të rrjedhjes së afatit kushtetues prej 30 ditësh për konstituimin e Kuvendit të ri.
“Kërkesa për masë të përkohshme është mundësia që të shmangim futjen e institucioneve në një bllokadë pa fund, si dhe hyrjen në një situatë ku institucionet mund të krijoheshin në mënyrë kundërkushtetuese dhe të ishin të paafatshme. Kërkesa bëhet për të parandaluar dëmin e pariparueshëm dhe për të ruajtur interesin publik, dy kritere të cilat duhet të përmbushen për çdo kërkesë të tillë,” tha Osmani.
Presidentja shtoi se kjo iniciativë vjen si pasojë e mungesës së dakordimit ndërmjet partive politike për formimin e institucioneve.
“Përkundër përpjekjeve të mia dhe takimeve të shumta me subjektet politike, Kuvendi ende nuk është konstituar. Kjo ka sjellë një bllokadë që e bën të pamundur funksionimin e Kuvendit dhe ushtrimin e ndonjë kompetence nga ana e tij,” deklaroi ajo.
Sipas Osmanit, kjo bllokadë ka filluar të prekë drejtpërdrejt edhe funksionalitetin e Presidencës.
“Për shkak të kësaj situate, Kuvendi nuk mund të vazhdojë punën. Po ashtu edhe Presidenca është e bllokuar, sepse shumë nga kompetencat e Presidentes janë të ndërlidhura me Kuvendin – siç janë ratifikimi i marrëveshjeve ndërkombëtare, çështjet që lidhen me Forcën e Sigurisë së Kosovës, rendi kushtetues dhe të tjera. Edhe Kuvendi është i lidhur me Presidenten, dhe kjo situatë nuk lejon që të vazhdohet puna,” theksoi Osmani.
Ajo e përmbylli fjalimin me një thirrje për urgjencën e zgjidhjes së kësaj krize institucionale, duke theksuar rëndësinë e vendimeve të Gjykatës Kushtetuese për të ruajtur rendin dhe funksionimin demokratik të shtetit.
