Masa e paraburgimit për pesë policët e dyshuar për vrasjen nga pakujdesia të një 27-vjeçari në Lipjan është anuluar, duke rikthyer çështjen për rivlerësim të bazuar në procedura të rregullta ligjore.
Lajmin e ka komentuar avokati Anton Nrecaj në emisionin “Ditari” në Tëvë1, i cili theksoi se vendimi i shkallës së parë ka qenë që nga fillimi në kundërshtim me procedurat penale të Republikës së Kosovës.
“Ka qenë e ditur që do të anulohej vendimi i shkallës së parë. Që në fillim, ai vendim për veprën e dyshuar ‘vrasje nga pakujdesia’ ka shkuar në kundërshtim me procedurat penale të Republikës së Kosovës,” deklaroi Nrecaj.
Ai kritikoi edhe arsyetimin e Gjykatës Themelore në Lipjan, e cila kishte përmendur si një nga bazat e caktimit të paraburgimit “presionin publik”, çka sipas Recajt, nuk përbën kriter të ligjshëm për një masë të tillë.
“Nëse i referoheni vendimit të Gjykatës në Lipjan, një nga pikat kryesore ishte se të akuzuarit janë në rrezik për shkak të presionit publik. Kjo nuk është në harmoni me procedurat penale dhe është praktikë e gabuar. Për të caktuar një masë si paraburgimi, duhet të përmbushen kritere strikte,” shtoi ai.
Nrecaj theksoi se ky rast duhet të shërbejë si kujdes i shtuar për vendimet e ardhshme gjyqësore, duke u bazuar rreptësisht në ligj dhe jo në trysni apo interpretime të papërshtatshme.
