Aeroporti i Stambollit në Turqi, aeroporti më i madh në Evropë, përsëri është kurorëzuar si aeroporti më i mirë në botë përmes një sondazhi nga revista kryesore e udhëtimeve Travel+Leisure, transmeton Anadolu.
Sipas një sondazhi të revistës, aeroporti është më i miri në botë për të dytin vit radhazi. “Aeroporti u bë edhe më i mirë, duke siguruar një rezultat prej 98.57 krahasuar me 95.79 të vitit të kaluar”, tha revista.
Thuhet se rezultati i këtij viti është “jashtëzakonisht mbresëlënës” duke marrë parasysh se Aeroporti i Stambollit u rendit në vendin e shtatë në sondazhin e vitit 2023, me një vlerësim nga lexuesit prej 83.36.
Aeroporti iGA i Stambollit, operatori i aeroportit, tha se ceremonia e ndarjes së çmimeve e mbajtur në Neë York City, ku ndodhet selia e revistës, mblodhi së bashku liderë të industrisë dhe të ftuar të shquar.
Çmimi për Aeroportin iGA të Stambollit iu dorëzua drejtorit të Komunikimit të Korporatës, Gökhan Şengül, nga kryeredaktore e revistës Travel+Leisure, Jacqueline Gifford.
“Jemi vërtet të nderuar që shërbimet që ofrojmë në iGA Istanbul Airport njihen jo vetëm për përsosmërinë operacionale, por edhe për vlerën e tyre kulturore. Është veçanërisht domethënëse për ne që kultura turke e njohur për mikpritjen, rafinimin dhe shërbimin e saj që tejkalon standardet globale spikat përmes aeroportit tonë”, tha Şengül.
“Duke vepruar kështu, ne krenohemi shumë që përfaqësojmë jo vetëm iGA, por edhe Stambollin dhe trashëgiminë e pasur kulturore të vendit tonë në skenën ndërkombëtare, duke kontribuar njëkohësisht në vlerën e markës së saj”, shtoi ai.
Sipas lexuesve të revistës, aeroportet u vlerësuan bazuar në aksesueshmëri, përvojën e regjistrimit, sigurinë, opsionet e ngrënies, blerjet dhe dizajnin e përgjithshëm.
Aeroporti iGA i Stambollit, i cili hyri për herë të parë në renditjen prestigjioze të revistës në vitin 2021, respektivisht aeroporti i parë turk që e bëri ndonjëherë këtë, ka dëshmuar edhe një herë përsosmërinë e tij duke u emëruar më i miri në botë për vitin 2024.
“Pas Aeroportit iGA të Stambollit në dhjetëshen më të mirë të këtij viti ishin disa nga aeroportet më të shquara në botë, duke përfshirë ato në Singapor, Katar, Emiratet e Bashkuara Arabe, Korenë e Jugut, Japoni, Indi dhe Hong Kong, duke theksuar arritjen e jashtëzakonshme të iGA-s në skenën globale”, tha iGA.
Aeroporti i Stambollit ishte aeroporti i dytë më i ngarkuar në Evropë vitin e kaluar dhe filloi operacionet e njëkohshme me tre pista këtë prill. Me këtë infrastrukturë, ai u bë i pari në Evropë që kishte tre pista dhe i dyti në botë, pas SHBA-së.
Sipas Drejtorisë së Përgjithshme të Aeroporteve Shtetërore, aeroporti u shërbeu rreth 80 milionë pasagjerëve në vitin 2024, duke e bërë atë aeroportin më të madh dhe të dytë më të ngarkuar në Evropë.
Sipas Raportit Vjetor të Trafikut të Evropës për vitin 2024 të Këshillit Ndërkombëtar të Aeroporteve (ACI), vitin e kaluar, Aeroporti i Stambollit gjithashtu u bë qendra më e ngarkuar e transportit ajror të mallrave në Evropë.
Sipas të dhënave javore nga Organizata Evropiane për Sigurinë e Navigimit Ajror (Eurocontrol), Aeroporti i Stambollit shpesh ka kryesuar Evropën për numrin e fluturimeve ditore.
