Me ftesë të Presidentit të Republikës së Letonisë, Edgars Rinkēvičs, presidentja e Kosovës, Vjosa Osmani ka udhëtuar për vizitë pune në Republikën e Letonisë.
Sipas Presidencës, gjatë kësaj vizite, Osmani përveç takimit tête-à-tête me presidentin letonez do të zhvillojë takim pune edhe me delegacionet përkatëse, si dhe do të marrë pjesë në drekën e punës të shtruar nga Rinkēvičs.
“Pas takimeve, të dy presidentët do të mbajnë një konferencë të përbashkët për media, me ç’rast Presidentja Osmani do t’i dorëzojë Presidentit Rinkēvičs medaljen ushtarake presidenciale për Forcat Mbrojtëse të Letonisë për kontributin e tyre për paqen dhe sigurinë si pjesë e KFOR-it”, thuhet në njoftim.
Më tej bëhet e ditur se gjatë vizitës njëditore, Osmani po ashtu do të vizitojë edhe Qendrën e Ekselencës së NATO-s për Komunikim Strategjik (STRATCOM), do të zhvillojë edhe takime me përfaqësues të Odës Ekonomike të Letonisë, si dhe do të ketë një diskutim me ekspertë dhe akademikë për politikat që garantojnë paqe dhe siguri të qëndrueshme.
“Vizita e Presidentes Osmani synon forcimin e mëtejshëm të marrëdhënieve ndërshtetërore me Letoninë, avancimin e bashkëpunimit bilateral në fushat e politikës së jashtme, mbrojtjes e sigurisë, ekonomisë, integrimit euroatlantik, si dhe shkëmbimit të përvojave në fuqizimin e institucioneve demokratike”, theksohet në njoftimin e Presidencës.
