Sekretari i Përgjithshëm i NATO-s, Mark Rutte, pritet të takohet këtë javë me presidentin amerikan, Donald Trump, vetëm pak kohë pas njoftimit të Trumpit për një plan të ri që përfshin shitjen e armëve aleatëve të NATO-s, të cilat më pas mund t’i kalojnë Ukrainës.
Rutte do të qëndrojë në Uashington të hënën dhe të martën, ku do të zhvillojë takime me Trumpin, Sekretarin e Shtetit Marco Rubio, Sekretarin e Mbrojtjes Pete Hegseth, si dhe me anëtarë të Kongresit amerikan, raporton AP.
“Do të takohem me sekretarin e përgjithshëm nesër,” u shpreh Trump të dielën në mbrëmje gjatë mbërritjes së tij në kryeqytet. “Do t’u dërgojmë atyre armë të avancuara dhe ata do të na i paguajnë 100%.”
Ndërkohë, senatori republikan Lindsey Graham, një nga mbështetësit kryesorë të Trumpit, deklaroi se konflikti në Ukrainë po i afrohet një momenti vendimtar.
Ai tha se Trump po tregon një interes të shtuar për të ndihmuar Ukrainën në përballjen me agresionin rus – një qëndrim që përfaqëson një ndryshim të qartë nga pozicionet e mëparshme të Trumpit, i cili e kishte cilësuar ndihmën për Ukrainën si një shpërdorim i fondeve të taksapaguesve amerikanë.
“Në ditët në vijim, do të shihni një rritje rekord të furnizimeve me armë për të ndihmuar mbrojtjen e Ukrainës,” tha Graham në emisionin “Face the Nation” të CBS.
Ai shtoi: “Një nga gabimet më të mëdha që ka bërë Putin është që ka nënvlerësuar Trumpin. Por prisni dhe shikoni – në javët që vijnë do të ketë një përpjekje të madhe për ta detyruar Putinin të ulet në tryezën e bisedimeve.”
