Tentim vrasje me armë zjarri në Shtime
Një 38-vjeçar është plagosur me armë zjarri nga një 32-vjeçar pasditen e sotme në fshatin Mollopolc të Shtimes.
Bazuar në të dhënat e para, dyshohet se plagosja ka ardhur si pasojë e një mosmarrëveshjeje të mëparshme.
Zëdhënësi i Policisë së Kosovës për rajonin e Ferizajt, Kanun Veseli ka bërë të ditur se pas incidentit, i dyshuari është larguar nga vendi i ngjarjes në një drejtim të panjohur.
Ndërkohë, ai bëri të ditur se viktima ka kërkuar ndihmë në oborrin e një shtëpie afër vendit të ngjarjes, ku është hasur nga ekipi i emergjencës së QKMF-së dhe i është ofruar ndihma e parë mjekësore.
“Menjëherë pas marrjes së informatës, në vendin e ngjarjes kanë dalë patrulla e stacionit policor në Shtime, hetuesit rajonalë si dhe njësia e Forenzikës Rajonale. Gjatë ekzaminimit të vendit të ngjarjes, janë gjetur dhe sekuestruar dy gëzhoja”, tha ai për teve1.info.
Ndërkaq, me autorizim të prokurorit të shtetit, është kryer bastisje në shtëpinë e të dyshuarit E.M., mirëpo ai nuk është hasur aty dhe policia thotë se aktualisht i njëjti ndodhet në arrati.
“Hetimet lidhur me rastin janë duke vazhduar me qëllim identifikimin dhe arrestimin e të dyshuarit”, tha Veseli./teve1.info/
