Një rast i dyshuar për kontrabandim me emigrantë është zbuluar sot në Terminalin Doganor në Ferizaj.
Ngjarja ka ndodhur rreth orës 16:00 në rrugën “Driton Islami”, ku zyrtarët doganorë kanë informuar Policinë se në rimorkion e një kamioni me targa vendore mund të ndodheshin disa persona pa dokumentacion.
Pas intervenimit të njësiteve relevante të Policisë së Kosovës, përfshirë Njësinë e Hetimeve dhe njësitet reaguese, është bërë hapja e rimorkios ku janë gjetur pesë emigrantë të paligjshëm – tre prej tyre të moshës 17-vjeçare, një 18-vjeç dhe një 28-vjeç. Të gjithë ata nuk posedonin dokument identifikimi.
Lidhur me rastin është ndaluar drejtuesi i kamionit, shtetasi kosovar me inicialet B.B. 38-vjeç, ndërsa për procedurat e mëtejme janë njoftuar prokurori kujdestar dhe Njësia për Migrim, të cilët kanë marrë rastin në trajtim.
Policia njofton se hetimet janë duke vazhduar për të zbardhur tërësisht rrethanat e ngjarjes dhe për të përcaktuar nëse kemi të bëjmë me rrjet të organizuar të kontrabandës me njerëz.
