Nga pamjet e publikuara pak minuta para ngjarjes tragjike së vdekjes së Agon Zejnullut e pësoi edhe gjyqtarja Elvira Emini, e cila u godit në kokë nga tani viktima.
Emini tash është një prej dëshmitareve të këtij rasti, bashkë me një prokuror.
Dosja e publikuar nga “Betimi për Drejtësi”, ka zbardhur disa dëshmi të rëndësishme të rastit që ka tronditur Kosovën.
“Pas rreth 10-15 minutash ka ardh patrulla policore, edhe në momentin kur ka ardh patrulla, ende pa arrit mirë, bashkëshorti im u nis në drejtim timin sepse u lodh duke prit dhe në ato momente ai person u nis pas bashkëshortit tim në drejtim tonin, dhe ata punëtorët e taksive kanë ikur brenda në lokal nga frika mos po i sulmon i njëjti, ndërsa unë nuk e dija kah t’ia mbaja, kisha frikën se mos po vjen me më sulmua mua. Ne u lodhëm pas kësaj ngjarje dhe vendosëm të ecim për në shtëpi. Unë dhe bashkëshorti u dakorduam që mos të bëjmë ankesë lidhur me këtë rast, duke marr parasysh edhe pozitat të cilat i kemi nuk deshëm që të bëhet e madhe nëpër portale, pasi që ne e vërejtëm se i njëjti nuk e kishte personale me neve, por kishte çrregullime dhe qëllimi i tij ishte pothuajse i njëjtë me të gjithë”, deklaroi gjyqtarja Elvira Emini.
Ndërkaq, një dëshmitar tjetër me inicialet G.B, tha se i ndjeri Zejnullahu në vazhdimësi thoshte se e kishte ndjesinë se dikush po e ndjekë.
“Unë e kam marrë Agonin dhe e kam afruar tek vetura ime, ku jam munduar ta qetësoj dhe e kam pyetur se çfarë ka, ndërsa i njëjti vetëm më thoshte ‘largomi se po më ngucin, mos i le me më nguc njerëzit rri me mua” ku këtë fjalë e ka përsëritur disa here… Disa herë jam munduar ta bindë që ta dërgoj tek doktori apo tek shtëpia e tij, mirëpo nuk ka pranuar, më pas aty ka ardhur edhe Prokurori Ardian Emini, i cili ka qenë kalimtar i rastit dhe i njëjti është ndalur vetëm për të shikuar se çfarë është duke ndodhur pasi që njihemi mes vete”, deklaroi një dëshmitar tjetër G.B..
Ky dëshmitar ka thënë se i ndjeri kishte shkumë në gojë.
“Gjatë qëndrimit në veturë prapë ka pasur shkumë në gojë të cilën e fshinte me bluzë tek kraharori herë pas here. Në një moment Agoni e ka shtyrë derën e veturës duke e hapur dhe ka dalë nga vetura me ç’rast ka tentuar të largohet nga zyrtarët policorë, mirëpo të njëjtit e kanë kapur dhe e kanë shtrirë për tokë, më pas nga një veturë e modelit Audi me ngjyrë të bardhë ka dalë një qytetar me rroba civile i cili më duket se ka qenë zyrtar policor sepse i njëjti ju ka ndihmuar gjatë arrestimit, unë i kam njoftuar zyrtarët policor që të mos e ngucin sepse Agoni nuk ka fuqi për të rezistuar, ndërsa e kam dëgjuar Agonin duke ju thënë policëve ‘mos më lidhni se nuk kam bërë kurgjo’”.
Pesë zyrtarëve policorë të dyshuar për vrasje nga pakujdesia, tashmë u është caktuar masa e paraburgimit prej një muaji.
