Gjykata Themelore në Prishtinë ka refuzuar kërkesën e Komunës së Prishtinës për vendosjen e një mase të përkohshme në lidhje me ndërmarrjen publike “Stacioni i Autobusëve”.
Me këtë vendim, përpjekja e radhës e kryetarit Përparim Rama dhe subjektit të tij politik, Lidhjes Demokratike të Kosovës (LDK), për të bllokuar funksionimin e kësaj ndërmarrjeje është rrëzuar nga drejtësia.
Kështu thotë asamblisti i VV-së, Gëzim Sveçla, duke deklaruar se edhe ky është një dështim tjetër në “përpjekjen për ta kthyer pronën publike në mjet pazari politik dhe shpërblimesh për sponsorë fushatash”.
“Pasi dështoi me planin e tij për privatizimin e stacionit dhe dhënien e tij si trofe për sponsorët e fushatave të partisë së tij, Rama provoi të bllokojë punën edhe përmes gjykatës. Edhe kjo tentativë u rrëzua”, deklaroi Sveçla.
Ai theksoi se vendimi i Komisionit Komunal të Aksionarëve për shkarkimin e Bordit të Drejtorëve të “Stacionit të Autobusëve” mbetet në fuqi dhe vlerësoi këtë si fitore për transparencën, drejtësinë dhe interesin e qytetarëve të Prishtinës.
“Koha e pazareve partiake me pronën publike ka marrë fund. Po ecim përpara”, përfundoi Sveçla.
