Ish-drejtori i Policisë së Kosovës, Reshat Maliqi, ka deklaruar në emisionin “Këndi i Debatit” në Tëvë1 se rasti i vdekjes së 27-vjeçarit, ku dyshohet për përfshirje të zyrtarëve policorë, duhet të shërbejë si një sinjal alarmi për reformim të brendshëm në Policinë e Kosovës.
Maliqi vlerësoi se ndonëse zyrtarët ndoshta nuk e kanë dëshiruar pasojën fatale, rasti kërkon përgjegjësi morale dhe se dorëheqjet nuk do të duhej të përjashtoheshin.
“Në këtë rast do të kishte qenë e udhës që dikush të jepte dorëheqje morale. Ndonëse besoj se zyrtarët policorë nuk e kanë dëshiruar pasojën, hetimet do të tregojnë pse dhe si ndodhi vdekja,” tha Maliqi.
Ai kritikoi kohëzgjatjen e trajnimit bazik për policët, i cili sipas tij është reduktuar nga 8 muaj në vetëm 3 muaj, duke vënë në dyshim cilësinë e përgatitjes së kuadrove të rinj.
“Ky është moment alarmi për Policinë e Kosovës. Nuk mund të përgatisësh një polic të standardit evropian me trajnim bazik prej vetëm tre muajsh,” theksoi ai.
Maliqi gjithashtu zbuloi se disa zyrtarë të rinj janë vendosur në detyra pa përfunduar trajnimin praktik në terren, që parashikon një vit nën mbikëqyrjen e një oficeri me përvojë praktikë që, sipas tij, nuk po respektohet.
“Ka raste kur policët janë dërguar në detyrë pa kryer trajnimin fushor që është i domosdoshëm. Kjo nuk duhet të tolerohet,” shtoi ai.
Në fund, Maliqi kritikoi edhe strukturën drejtuese të policisë, duke thënë se ka kolonelë dhe nënkolonelë të cilët nuk kontribuojnë në punën reale.
“Ka zyrtarë të lartë që vetëm figurojnë në lista, por nuk angazhohen. Është mirë që gjithçka të rishqyrtohet. Fatmirësisht, në këtë rast ka qenë prezent një rreshter, përndryshe vetëm policët e ndërrimit do të përballeshin me gjithë situatën,” përfundoi Maliqi.
Ky reagim vjen në një kohë kur hetimet për vdekjen e 27-vjeçarit janë në zhvillim, ndërsa pesë zyrtarë policorë janë suspenduar dhe arrestuar nën dyshimin për veprën penale “vrasje nga pakujdesia”.
