Avokati Xhevdet Smakiqi ka komentuar rastin e vdekjes së 27-vjeçarit i cili humbi jetën pas një ndërhyrjeje policore në Lipjan. Në emisionin “Info Nata” në Tëvë1, ai theksoi se pamjet e publikuara tregojnë qartë përdorim të forcës nga ana e zyrtarëve policorë, duke e cilësuar situatën si shumë shqetësuese dhe jo të izoluar.
“Ky nuk është një rast i vetëm. Vetëm para pak ditësh patëm një incident në Klinë ku zyrtarët policorë keqtrajtuan një qytetar. Arrestimi i pesë policëve sot, megjithatë nënkupton prezumimin e pafajësisë, është një hap pozitiv për sistemin juridik – sepse askush nuk duhet të jetë mbi ligjin, e sidomos jo zyrtarët e rendit,” deklaroi Smakiqi.
Ai shtoi se nga pamjet duket qartë një përdorim joproporcional i forcës, dhe me shumë gjasë, autopsia do të ndihmojë në zbardhjen e shkaqeve të vdekjes.
“Pamjet janë të rënda, tronditëse dhe nuk i takojnë një polici profesionale. Janë në kundërshtim me ligjin – nuk guxon të ushtrohet dhunë ndaj qytetarëve në atë mënyrë,” shtoi ai.
Smakiqi theksoi nevojën për reformë në sistemin policor, duke sugjeruar që duhet të shihet nëse zyrtarët e përfshirë janë pjesë e rekrutimeve të fundit dhe se këto raste duhet të shërbejnë si mësim për të parandaluar situata të ngjashme në të ardhmen.
Në fund, ai kritikoi edhe vakumin institucional, duke theksuar se mungesa e një qeverie të konsoliduar ndikon negativisht në funksionimin e shtetit të së drejtës dhe përgjegjësinë institucionale.
