Të paktën 26 palestinezë janë vrarë të hënën nga sulmet ajrore izraelite në të gjithë Rripin e Gazës, sipas burimeve spitalore që folën për Al Jazeera.
Sulmet goditën disa zona, përfshirë Beit Lahiya-n, qytetin e Gazës, kampin e refugjatëve Bureij dhe Rafahun.
Ministria palestineze e Shëndetësisë raportoi se spitalet në gjithë enklavën e rrethuar kanë pranuar të paktën 105 trupa dhe 356 të plagosur periudhës 24-orëshe, duke theksuar krizën e rëndë humanitare që po zhvillohet.
Përtej sulmeve ajrore dhe shkatërrimit, Gaza po përballet me një krizë të paprecedentë urie.
Bassam Zaqout, drejtor i Shoqatës së Ndihmës Mjekësore në Gaza, foli për Al Jazeera lidhur me gjendjen e rëndë humanitare.
“Po përjetojmë mungesë të theksuar ushqimi, dhe mungesa e qumështit për foshnjat është një problem madhor,” tha ai. “Të gjithë në Gaza po vuajnë nga uria. Kjo situatë duhet të marrë fund.”
Zaqout theksoi se disa banorë janë detyruar të hanë bar dhe gjethe për të mbijetuar, pasi qasja në ushqime bazë është pothuajse e pamundur.
Kriza humanitare ka arritur nivele kritike, dhe agjencitë e ndihmës bashkë me profesionistët shëndetësorë paralajmërojnë se, pa një ndërhyrje të menjëhershme ndërkombëtare, numri i viktimave nga uria dhe sëmundjet e parandalueshme mund të rritet ndjeshëm.
Organizatat ndërkombëtare vazhdojnë të bëjnë thirrje për përfundimin e dhunës dhe për hapjen e korridoreve humanitare, por qasja në ndihma mbetet tejet e kufizuar.
Që nga fillimi i luftës së Izraelit në Gaza në tetor 2023, numri i të vrarëve ka arritur në 57,523 dhe i të plagosurve në 136,617, ndërsa mijëra të tjerë mendohet të jenë ende të bllokuar nën rrënoja.
