Deputeti i Lidhjes Demokratike të Kosovës, Besian Mustafa, ka reaguar ashpër ndaj qëndrimit të kryesuesit të seancës konstituive, Avni Dehari, lidhur me insistimin për votim të fshehtë në Kuvend.
Në një reagim publik, Mustafa e cilësoi deklaratën e Deharit si të njëanshme dhe autoritare, pasi ky i fundit kishte deklaruar se “do të ishte shkelje kushtetuese nëse deputetët do të pyeteshin nëse janë për votim të fshehtë apo jo”.
Mustafa ironizoi faktin që, sipas Deharit, ndalimi i pyetjes drejtuar deputetëve konsiderohet kushtetues, ndërsa vendimi i njëanshëm për ndryshim të mënyrës së votimit – pa konsultim – po quhet i ligjshëm.
“Pra, sipas tij, deputetët s’bën me i pyet, ata veç duhet me ulë kryet edhe me votu,” shkroi Mustafa, duke shtuar se një qasje e tillë është shembull i mendësisë së Vetëvendosjes, që kërkon nënshtrim dhe jo debat demokratik.
Ai e përmbylli reagimin e tij duke theksuar se çdo vendim që mbyll gojën e deputetëve dhe i anashkalon ata nga proceset vendimmarrëse nuk mund të jetë kushtetues, por përkundrazi, cenon thelbin e përfaqësimit parlamentar.
