Golden Eagle Ylli ka bërë hap të madh drejt titullit të kampionit të Kosovës në basketboll.
Ylli të enjten mbrëma në palestrën “Minatori” në Mitrovicë ka fituar bindshëm ndaj Trepçës vendase me rezultatin 60:46.
Palestra ishte e mbushur me shikues dhe Trepça kishte përkrahje të madhe. Por kjo nuk kreu punë ndaj therandasve, që në parket shfaqën nivel dukshëm më të lartë. Tani skuadra nga Suhareka udhëheq 2:0 në serinë finale të plejofit. Është vetëm edhe një fitore larg titullit të kampionit, ku ndeshja e tretë luhet në Suharekë, të dielën, dhe mund të jetë festive për Yllin.
Ylli vjet e kishte fituar titullin e parë, duke e mposhtur Pejën 3:0 në serinë finale të plejofit.
Therandasit e nisën mirë ndeshjen, ndërsa çerekun e parë e fitoi me shifrat 22:6. Dhe nuk shikoi më prapa.
Dajuan Graf kishte shifrat më të mira te Ylli. Ai realizoi 11 pikë, tetë kërcime e shtatë asistime. Më efikasi ishte Henrik Shirko me 13 pikë, por që nuk kishte efikasitet të lartë. Ndërkohë Mikaile Tmushiq kontribuoi me 12 pikë e gjashtë kërcime.
Te Trepça dëshpëruan lojtarët bartës. Rodney Purvis shënoi vetëm katër pikë. Ai kishte plot nëntë tentime për dy pikë, ndërsa i qëlloi vetëm dy. Për tri pikë i kishte gjashtë tentime të pasuksesshme.
Drilon Hajrizi i realizoi tetë pikë. Qëlloi dy nga tetë tentimet për dy pikë dhe një nga katër tentimet për tri pikë. Qendra Andrew Gordon u dallua me 15 pikë e nëntë kërcime. Pikë dyshifrore realizoi vetëm edhe Mike Edwards – 10.
