Turqia dërgoi të shtunën dy avionë zjarrfikës dhe njëmbëdhjetë automjete mbështetëse drejt Sirisë për të ndihmuar në përballimin e zjarreve që kanë përfshirë rajonin veriperëndimor të Latakisë.
Sipas ministrit sirian të emergjencave, Raed Al Saleh, ndihma turke u vonua me afro një ditë për shkak të zjarreve të papritura që shpërthyen edhe brenda vetë territorit turk.
Turqia është përfshirë nga zjarre që nga 26 qershori, duke goditur veçanërisht pjesën perëndimore të vendit.
Ministri i Pylltarisë, Ibrahim Yumakli, njoftoi se zjarrfikësit kanë arritur të vënë nën kontroll 10 vatra të mëdha, megjithatë një punëtor pyjor, i lënduar më herët, ka ndërruar jetë në komunën Odemis, në provincën e Izmirit. Ai është viktima e tretë e regjistruar në këtë zonë.
Autoritetet turke kanë deklaruar se shumica e zjarreve në provincën e Izmirit janë shkaktuar nga defekte në linjat e energjisë elektrike.
Ndërkohë, në provincën jugore të Hatayt, pranë kufirit me Sirinë, flakët vazhduan të përparojnë në rrethin Dortyol.
Zjarri, që shpërtheu të premten pasdite pranë një zone të banuar, u përhap me shpejtësi për shkak të erërave të forta. Si masë parandaluese, rreth 920 shtëpi u evakuuan, sipas guvernatorit Mustafa Musatli.
Ministri i Brendshëm turk, Ali Yerlikaya, raportoi se janë ndaluar 44 persona të dyshuar për përfshirje në shpërthimin e 65 zjarreve në të gjithë vendin.
Zjarret që kanë përfshirë Turqinë, Greqinë dhe Sirinë gjatë ditëve të fundit janë nxitur nga temperaturat ekstreme, erërat e fuqishme dhe lagështia e ulët.
Në Turqi, flakët kanë detyruar dhjetëra mijëra persona të largohen nga shtëpitë e tyre dhe kanë shkaktuar dëme në rreth 200 banesa, raporton AP.
Ndërkohë, Mbrojtja Civile Siriane ka ngritur shqetësime për praninë e municioneve të pashpërthyera në disa nga zonat e prekura nga zjarret, duke e bërë ndërhyrjen edhe më të rrezikshme.
Zjarret në rajonin lindor të Mesdheut janë të zakonshme gjatë verës, por intensiteti dhe përhapja e tyre këtë vit po i tejkalojnë nivelet e zakonshme.
