Udhëheqësi Suprem i Iranit, Ajatollah Ali Khamenei, është shfaqur publikisht për herë të parë që nga përfundimi i luftës me Izraelin për të marrë pjesë në ceremonitë e Ashures në Teheran.
Khamenei mungonte në ceremonitë gjatë fillimit të Vitit të Ri Musliman, Muharrem, të mbajtura në rezidencën e tij në Rrugën Palestinë për tre netët e fundit, por ai u shfaq të shtunën për ceremonitë solemne për të përkujtuar martirizimin e Imam Huseinit, raportoi Anadoly.
Pamjet në X nga llogaria zyrtare e udhëheqësit suprem tregonin të pranishmit në rezidencën Hosseinieh të Imam Khomeinit duke mirëpritur Khamenein ndërsa ai hynte në një sallë.
Gjatë një lufte 12-ditore midis Iranit dhe Izraelit muajin e kaluar, Presidenti i SHBA-së Donald Trump dhe Tel Avivi kërcënuan të vrisnin Khamenein.
Khamenei u pa duke mbajtur fjalime gjatë sulmit ndaj Iranit. Pasi u arrit një armëpushim, Irani akuzoi Uashingtonin se u bashkua me sulmet për të shpëtuar Tel Avivin, të cilit Irani iu përgjigj me kundërsulme.
Tre ditët e para të ceremonive të Muharremit të këtij viti u mbajtën në rezidencën e Khameneit për herë të parë pa pjesëmarrjen e tij.
Një konflikt midis Izraelit dhe Iranit shpërtheu më 13 qershor kur Izraeli nisi sulme ajrore ndaj objekteve ushtarake, bërthamore dhe civile iraniane, duke vrarë të paktën 935 persona. Ministria iraniane e Shëndetësisë tha se 5,332 persona u plagosën.
Teherani nisi sulme hakmarrëse me raketa dhe dronë, duke vrarë të paktën 29 persona dhe duke plagosur më shumë se 3,400 të tjerë, sipas shifrave të publikuara nga Universiteti Hebraik i Jerusalemit.
SHBA-të bombarduan objektet bërthamore të Iranit në Fordo, Natanz dhe Isfahan, duke përshkallëzuar konfliktin.
Konflikti përfundoi me një armëpushim të ndërmjetësuar nga SHBA-të, i cili hyri në fuqi më 24 qershor.
