Deputeti i Lidhjes Demokratike të Kosovës, Armend Zemaj, ka deklaruar se partia e tij nuk do të mbështesë asnjë kandidat të Lëvizjes Vetëvendosje për kryetar të Kuvendit, pa një marrëveshje politike paraprake.
Në një intervistë në emisionin “Mesditë” në Tëvë1, Zemaj u shpreh se vota e LDK-së është kundër çdo kandidati të VV-së në mungesë të një marrëveshjeje të qartë ndërmjet partive.
“Nuk do ta votojmë asnjë kandidat pa marrëveshje politike. E kemi theksuar se nuk e votojmë asnjë kandidat – vota jonë është kundër dhe na lejohet të votojmë kundër”, tha Zemaj.
Ai shtoi se LDK-ja nuk e sheh këtë çështje si personale ndaj individëve, por si një proces që duhet të kalojë përmes vlerësimit politik.
“Ne nuk jemi ata që pranojmë apo s’pranojmë, ne jemi ata që vlerësojmë politikisht. Nuk votojmë asnjë kandidat pa marrëveshje politike. Nuk ka të bëjë me individin, por me procesin politik dhe atë që na takon si subjekt politik”, shtoi ai.
Zemaj kritikoi gjithashtu çdo përpjekje të VV-së për të zgjedhur kryetarin e Kuvendit pa konsensus të gjerë.
“Pa marrëveshje politike, VV-ja duhet të sigurojë konsensus dhe jo të tentojë zgjedhje të kryetarit në mënyrë të fshehtë apo përmes joshjes së deputetëve”, përfundoi Zemaj.
