Kryeministri i Shqipërisë, Edi Rama, e ka vlerësuar doganën Morinë–Vërmicë si një nga shembujt më të suksesshëm të bashkëpunimit ndërmjet Shqipërisë dhe Kosovës.
Në një deklaratë të bërë pas një vizite në këtë pikë kufitare, Rama tha se kjo doganë ka lehtësuar ndjeshëm qarkullimin e udhëtarëve dhe ka reduktuar kohën e zhdoganimit për bizneset në të dy anët e kufirit.
“Dogana Morinë–Vërmicë është një nga pikat më të rëndësishme të bashkëpunimit tonë dhe ka sjellë përfitime konkrete për qytetarët dhe bizneset tona”, u shpreh Rama.
Në këtë vizitë morën pjesë edhe ministrat e Financave të dy vendeve – Hekuran Murati nga Kosova dhe Petrit Malaj nga Shqipëria – të cilët, sipas Ramës, konfirmuan angazhimin për përmirësimin e mëtejshëm të shërbimeve.
“Vizita e përbashkët konfirmoi përkushtimin për të garantuar funksionim të plotë 24/7 dhe për të eliminuar çdo vonesë në këtë pikë doganore”, tha Rama.
Sipas të dhënave zyrtare, vetëm gjatë periudhës janar–maj 2025, kjo pikë kufitare ka përballuar një fluks prej 3 milionë qytetarësh dhe 1.1 milionë automjetesh.
