Bega sonte në Tëvë1 deklaroi se Qeveria nuk ka ndërmarrë hapa konkrete për ta luftuar inflacionin sikurse që kanë vepruar shtete e rajonit apo edhe ato të Evropës.
“Inflacioni nuk luftohet me kësi lloj masash. Inflacioni luftohet me instrumenta fiskal të cilat për fatkeqësinë tonë Qeveria nuk i ka ndërmarrë, të gjitha shtete e rajonit dhe ato në Evropë kanë ndikuar në politikat fiskale që të zbusin ndikim e inflacionit në produktet esenciale dhe ne jemi mjaftuar me këtë paketën nga 100 euro që e shpërndau që është e natyrës së njëjtë dhe e dëmshme sepse nuk zgjidh problemin nuk mund sot ta mbrosh atë paketë dhe ta kundërshtosh Trusin sepse është e njëjta gjë në fund”, tha ai.
Tutje Bega në emisionin “Këndi i Debatit” theksoi se skemat sociale janë kategoria më e prekur nga ky inflacion pasi që sipas tij, ka kaluar në inflacion dyshifror ku çmimet e produkteve ushqimore, karburanteve dhe transportit janë ngritur shumë.
“Qeveria nuk ka ndërmarrë veprime për t’i indeksuar skemat sociale të cilat janë ato që janë prekur më së shumti nga inflacioni sepse ka kaluar në inflacion dyshifror, produktet ushqimore janë 16.6 të ngritura, kemi pjesën e transportit që ka shkuar mbi 20 për qind, shohim karburantet janë diku afër 35 për qind që ka ngitje të çmimeve dhe Qeveria ka vazhduar të jetë pasive dhe sigurisht që kjo ka prodhuar pakënaqësi tek qytetarët të cilët në hallet e tyre kërkojnë zgjidhje prej qeverisë. Ata duke mos qenë njohës të fushës ju kujtohet tërheqja e parë nga Trusti dhe kërkojnë që ta përsërisin atë dhe për mua mbetet një propozim i popullit sepse ky është e vërtetë që e elektrizon masën mirëpo dëmton një shtyllë të rëndësishme të shoqërisë, në këtë rast siç janë fondet pensionale”, tha Bega.
