Amnesty International publikoi të enjten një raport të ri, ku akuzon Izraelin dhe Shtetet e Bashkuara se mbështesin një sistem shpërndarjeje ndihmash në Rripin e Gazës që, sipas organizatës, përdor taktika urie dhe kontribuon në vazhdimin e një gjenocidi ndaj popullsisë palestineze gjatë luftës.
Organizata për të drejtat e njeriut, me seli në Mbretërinë e Bashkuar, kritikoi ashpër Izraelin dhe Fondacionin Humanitar të Gazës (GHF) – një mekanizëm i mbështetur nga Izraeli dhe SHBA – i cili ka marrë përsipër shpërndarjen e ndihmave humanitare në vend të rrjetit tradicional të udhëhequr nga Kombet e Bashkuara.
Në përgjigje, Ministria e Jashtme izraelite e cilësoi raportin si të pabesueshëm, duke e akuzuar Amnesty International për bashkëpunim me Hamasin dhe për përhapjen e “gënjeshtrave propagandistike” të tij.
Sipas Ministrisë së Shëndetësisë në Gaza, më shumë se 500 palestinezë janë vrarë gjatë muajit të fundit në ose pranë qendrave të shpërndarjes së GHF-së, raporton AP.
Këto qendra, të mbrojtura nga kompani private sigurie dhe të vendosura afër pozicioneve ushtarake izraelite, janë bërë vendngjarje të dhunshme.
Sipas dëshmitarëve dhe zyrtarëve palestinezë, forcat izraelite kanë qëlluar mbi turmat që përpiqeshin të merrnin ndihma.
Raporti i Amnesty thekson se Izraeli ka “kthyer kërkimin për ndihmë humanitare në një kurth vdekjeprurës për palestinezët e dëshpëruar”, duke e përshkruar sistemin aktual si një përzierje të rrezikshme urie dhe sëmundjesh që po e shtyn popullsinë në prag të shkatërrimit.
“Kjo humbje e përditshme e jetëve njerëzore, ndërsa palestinezët përpiqen të sigurojnë ndihma, është rezultat i qëllimshëm i veprimeve të forcave izraelite dhe i metodave të rrezikshme të shpërndarjes”, tha Agnès Callamard, sekretare e përgjithshme e Amnesty International.
Raporti pason një deklaratë të mëparshme të bërë këtë javë nga mbi 165 organizata të mëdha humanitare dhe OJQ ndërkombëtare, të cilat kërkojnë mbylljen e menjëhershme të Fondacionit Humanitar të Gazës.
Sipas tyre, mekanizmi aktual i jep Izraelit kontroll mbi ushqimin si armë dhe përbën një shkelje të parimeve themelore humanitare.
GHF-ja, një iniciativë e udhëhequr nga një figurë ungjillore e afërt me ish-presidentin Donald Trump, ka qenë objekt i kritikave të shumta që nga krijimi i saj
