Disa pasagjerë u plagosën të enjten pasdite në një sulm me thikë që ndodhi në një tren me shpejtësi të lartë që po udhëtonte nga Hamburgu drejt Vjenës, njoftuan autoritetet gjermane.
Sipas policisë së Bavarisë, incidenti ndodhi rreth orës 13:55 me kohën lokale, ndërsa treni po kalonte pranë qytetit Regensburg dhe ishte në drejtim të Plattlingut. Në momentin e sulmit, në bord ndodheshin rreth 500 pasagjerë.
Policia konfirmoi se katër persona u plagosën lehtë dhe se autori i sulmit është arrestuar menjëherë nga forcat e sigurisë. Nuk janë bërë publike ende detaje mbi identitetin apo motivet e autorit, sipas raportimit të Anadoly.
Pas incidentit, treni bëri një ndalesë emergjente pasi pasagjerët aktivizuan frenën e emergjencës. Shërbimet e emergjencës reaguan me një prani të madhe në vendngjarje, duke rrethuar zonën për të siguruar trenin dhe për të ndihmuar të plagosurit.
Hetuesit kanë nisur mbledhjen e provave dhe analizimin e ngjarjes për të përcaktuar rrethanat e plota të sulmit. Autoritetet nuk kanë dhënë ende informacion nëse sulmi ka lidhje me ndonjë motiv të caktuar apo nëse ka elemente terroriste.
Tragjedia vjen në një kohë të ndjeshme për sigurinë publike në transportin hekurudhor europian, duke shtuar shqetësimet për mbrojtjen e udhëtarëve në rrjetet e transportit masiv.
