Kryeministri në detyrë i Republikës së Kosovës, Albin Kurti, së bashku me ministrin në detyrë të Financave, Punës dhe Transfereve, Hekuran Murati, kanë zhvilluar sot një drekë pune me Ambasadorin e Turqisë në Kosovë, Sabri Tunç Angılı.
Sipas njoftimit zyrtar, gjatë takimit u diskutua për marrëdhëniet bilaterale ndërmjet Kosovës dhe Turqisë, zhvillimet e fundit në vend, si dhe tema të tjera me interes të ndërsjellë, me theks të veçantë në bashkëpunimin ekonomik dhe tregtar.
Kryeministri Kurti shprehu mirënjohjen e tij për mbështetjen e vazhdueshme të Turqisë ndaj Kosovës, veçanërisht në fushën e mbrojtjes dhe sigurisë, si dhe për kontributin e saj në forcimin e raporteve ndërmjet dy shteteve.
