Kriza humanitare në Gaza po thellohet ndërsa furnizimet jetike për foshnjat janë duke shteruar.
Mjekët në territor paralajmërojnë se mijëra foshnje dhe të porsalindur janë në rrezik të vdekjes nga uria, për shkak të mungesës ekstreme të formulës për foshnje dhe kolapsit të sistemit shëndetësor të mbingarkuar dhe të izoluar.
Bllokada izraelite, që ka pamundësuar hyrjen e ndihmave humanitare, ka çuar në mungesë totale të qumështit artificial për foshnjat. Në të njëjtën kohë, shumë nëna, të uritura, të sëmura dhe të traumatizuara, nuk janë më në gjendje të ushqejnë fëmijët e tyre me gji.
Mjekët e përshkruajnë situatën si një “katastrofë të heshtur”, që po zhvillohet larg syve të botës, por me pasoja të tmerrshme për më të pambrojturit – foshnjat dhe të porsalindurit.
Në një deklaratë të publikuar nga Hamasi, theksohet rreziku në rritje për jetën e fëmijëve, jo vetëm për shkak të sulmeve, por edhe për shkak të përhapjes së sëmundjeve si meningjiti dhe mungesës së furnizimeve bazë.
“Një katastrofë e re po kërcënon fëmijët me përhapjen e meningjitit, ndërsa sistemi shëndetësor është në kolaps të plotë. I bëjmë thirrje komunitetit ndërkombëtar të ndërhyjë menjëherë për të shpëtuar fëmijët e Gazës, të cilët po përballen me një tragjedi humanitare të paprecedentë,” thuhet në deklaratë.
Në spitalin al-Shifa, që dikur ishte objekti më i madh shëndetësor në Gaza, situata është bërë e pashpresë.
Gjeneratorët rezervë janë pa karburant dhe shumë shërbime jetike janë ndalur, përfshirë dializën, duke lënë pacientët në rrezik vdekjeje të menjëhershme.
Ky spital, thonë mjekët, nuk është më një vend shërimi, por një “dhomë pritjeje për vdekje”.
“Këtu nuk është më vetëm çështje e mbijetesës nga bombardimet. Është çështje e mbajtjes së fëmijëve gjallë – që do të thotë mbajtja në funksion e energjisë, furnizimi me ushqim dhe ndihma shëndetësore bazë,” tha një mjek lokal.
Ndërkohë, raportet nga terreni tregojnë se civilët sulmohen edhe kur kërkojnë ushqim në rrugë apo grumbullohen në vende publike, si kafene apo tregje. Një kafene buzë detit u bombardua së fundmi, duke shtuar frikën tek popullata e uritur që tashmë nuk ka ku të kërkojë strehë ose ndihmë, ka raportuar Al Jazeera.
Mungesa e formulës për foshnje dhe e ndihmës ushqimore, në një kontekst të bllokadës totale dhe shkatërrimit sistematik të infrastrukturës shëndetësore, po krijon kushte të pamundura për jetesë për më të vegjlit.
Mjekët dhe organizatat humanitare po bëjnë thirrje të dëshpëruara për ndërhyrje të menjëhershme ndërkombëtare për të shmangur një valë vdekjesh foshnjore që, siç thonë ata, është plotësisht e parandalueshme.
