Mbi 112 mijë euro i ka paguar Ministria e Punëve të Brendshme, për punonjësit e komunitetit serb, të cilët nuk paraqiten fare në punë.
Raporti i Auditimit për Pasqyrat Financiare vjetore të MPB-së për vitin 2024, ka zbuluar se ministria nuk ia ka dalur t’i sistemoj këta punonjës.
“Kjo dukuri vazhdon të jetë prezente ndër vite edhe pse në vazhdimësi raportohet në raportet tona të auditimit. Ministria ende nuk ka arritur të ndërmerr masa konkrete në sistemimin, angazhimin dhe monitorimin e kësaj kategorie të të punësuarve. Pagesat e pagave në mungesë të vijueshmërisë në punë, janë pagesa të parregullta dhe shkaktojnë dëmtimin e buxhetit të Ministrisë”, thuhet në raport.
Raporti ka evidentuar edhe një sërë parregullësishë të tjera.
Gjatë vitit 2024, në raport theksohet se Policia e Kosovës pagoi shtesa për zyrtarët e suspenduar, jashtë afatit të lejuar.
Për këtë çështje u paguan 55 mijë e 550 euro.
“Ne identifikuam se shtesën e plotë për kushte specifike të punës ishin duke e marrë 65 zyrtarë policorë të suspenduar, edhe pse ata nuk ishin duke e ushtruar funksionin e rrjedhimisht nuk kishin ndonjë rrezikshmëri… Nga lista e zyrtarëve të suspenduar e pranuar nga stafi përgjegjës vërehet se kishte edhe zyrtarë policorë që ishin suspenduar nga viti 2022 dhe ende vazhdojnë të kompensohen me 50 për qind të pagës”, thuhet nga ZKA.
Ndërkaq nga gjetjet e Auditorit, mbi 340 punonjës në Policinë e Kosovës janë të sistemuar në pozita pa e plotësuar kriterin e gradës.
“Në vitin aktual rreth 341 staf policor ushtronin funksionin për të cilat kërkohet gradë më e lartë e që në raport me vitin paraprak ky numër ishte rritur për 156… Shkak i kësaj ishte implementimi i strukturës organizative ku janë krijuar departamente/divizione/drejtori të reja dhe situata e krijuar në veri të vendit ku për nevoja operacionale pozitat janë plotësuar me grada jopërkatëse si dhe dështimi i procesit për rreshter”, thuhet tutje
Për këto të gjetura, Tëvë1 ka kontaktuar Policinë e Kosovës, mirëpo deri në publikimin e kronikës, nuk ka pranuar përgjigje.
