Njohësi i çështjeve të arsimit, Rinor Qehaja, ka ngritur shqetësime serioze lidhur me mbarëvajtjen e Testit të Arritshmërisë që u mbajt sot në të gjitha shkollat e Kosovës për nxënësit e klasave të nënta.
Sipas tij, problemi kryesor nuk qëndron vetëm tek përmbajtja e testit, por tek mënyra se si ai administrohet, që siç thotë ai reflekton një kulturë të thellë të keqmenaxhimit dhe mungesës së llogaridhënies.
“Procesi në tërësi, mbarëvajtja përtej asaj që është prezantuar nga kanalet zyrtare, është me problemet e njëjta, të ripërsëritura të keqadministrimit ose neglizhencës në administrim”, ka deklaruar Qehaja në emisioni “Info Nata” në Tëvë1.
Ai theksoi se si pasojë e këtij keqmenaxhimi, gjatë testit janë vërejtur raste të shumta të kopjimit dhe komunikimit të nxënësve përmes telefonave, dukuri që ai e cilëson si dëmtim të besueshmërisë së rezultateve të testit.
“Për produkt ka edhe atje shpërdorimet në kopjim, komunikim përmes telefonave nga ana e nxënësve, që pastaj detyrimisht na sjell një rezultat që nuk është fare i besueshëm”, tha ai.
Qehaja shtoi se problemi nuk kufizohet vetëm tek Testi i Arritshmërisë, por është i pranishëm edhe në Testin e Maturës, duke e bërë të domosdoshëm një rishikim të plotë të sistemit të vlerësimit në arsim.
“Jo vetëm Testi i Arritshmërisë, edhe i Maturës është duke na rikthyer vëmendjen për një llogaridhënie më të rritur sa i përket vlerësimit më të standardizuar, që në të vërtetë e bën një filtrim të mirëfilltë të nxënësve – qoftë kalimin nga klasa e 9-të në të 10-tën, qoftë maturantëve për shkollimin universitar,” u shpreh Qehaja.
