Përmes një postimi në Facebook, Tahiri tha se Qeveria Kurti nuk po lë gurë pa lëvizur, që këtë shtresë ta dobësojë ose ta eliminojë.
“Qeveria Kurti e ka vendosur në shënjestër shtresën e mesme të qytetarëve të Kosovës. Nuk po lë gurë pa lëvizur, që këtë shtresë ta dobësojë ose mundësisht ta eliminojë si të tillë”, ka shkruar ai.
Tahiri ka dhënë tri veprime të Qeverisë për të cilat thotë se po shkatërrohet shtresa e mesme e qytetarëve, ku si pikë të parë ka përmendur shtrenjtimin e energjisë elektrike.
“Çmimin e rrymës e ngriti pikërisht në kurriz të kësaj shtrese, i liroi korporatat e mëdha nga ngritja e çmimit, ua subvencionoi ngritjen shtresës tjetër që nuk jetojnë në zonën urbane. Ndërkohë, koston e ngritjes po e paguajnë shtresa e mesme, që sot jetojnë me nga një pagë të nivelit mesatar”, ka thënë ai.
Ai po ashtu ka kritikuar qeverinë për ndarjen e 100 eurove për çdo të punësuar që ka pagën nën 1000 euro.
“Shpërndau ndihma gjithandej Kosovës me kritere skajshmërisht diskriminuese, duke e përjashtuar sërish shtresën e mesme, që marrin pagë mbi 1000 euro, e që në shumicën e rasteve kanë vetëm një të punësuar në familje. Ndërkohë, që me vendimin e Qeverisë, hipotetikisht mund të përfitojnë ndihma dy bashkëshortët që marrin nga 950 euro pagë, e pse jo edhe ndonjë fëmijë i tyre në emër të statusit të studentit”, ka thënë Tahiri.
Ndërkaq, si pikë të tretë, Tahiri thotë se goditja fatale e kësaj shtrese po i jepet duke mos e votuar Ligjin për Trustin.
“Tani goditja fatale kësaj shtrese po i jepet duke mos votuar Ligjin për Trustin, duke ua pamundësuar shfrytëzimin e mjeteve të tyre (po e përsëris: mjetet e tyre) dhe arsyetimi banal i tyre është se nga ky ligj përfitojnë të pasurit!
Pra, këta qytetarë po trajtohen vetëm si pagues të taksave dhe po privohen nga çfarëdo përfitimi që indirekt rrjedh pikërisht prej këtyre taksave”, ka përfunduar Tahri. /teve1.info/
