Presidenti amerikan, Donald Trump ka hedhur poshtë gjetjet paraprake të inteligjencës amerikane, sipas të cilave sulmet ajrore të Shteteve të Bashkuara ndaj Iranit kanë vonuar programin bërthamor të Teheranit vetëm për disa muaj.
Trump u shpreh me vendosmëri se rezultatet e operacionit ishin “zhdukje e plotë,” duke sfiduar vlerësimet e agjencive të inteligjencës.
Ndërkohë, Sekretari amerikan i Mbrojtjes, Pete Hegseth, njoftoi se do të nisë një hetim për të zbuluar se kush ka rrjedhur gjetjet paraprake të inteligjencës, të cilat tregojnë se ndikimi i sulmeve ka qenë më i kufizuar sesa ishte pretenduar fillimisht, ka raportuar AP.
“Ishte një raport paraprak, me besueshmëri të ulët,” tha Hegseth, ndërkohë që Trump po takohej me Sekretarin e Përgjithshëm të NATO-s, Mark Rutte, në samitin në Hagë.
Deklarata e Hegsethit vjen në një moment kur janë shtuar debatet në Uashington mbi përmasën reale të efektit të sulmeve amerikane dhe saktësinë e informacionit të shpërndarë për publikun dhe aleatët.
Trump gjithashtu bëri një krahasim historik, duke e lidhur sulmin me fundin e Luftës së Dytë Botërore. “Ai goditje i dha fund luftës. Nuk dua të përdor një shembull të Hiroshimës. Nuk dua të përdor një shembull të Nagasakit,” tha Trump. “Por kjo ishte në thelb e njëjta gjë. Kjo i dha fund asaj lufte.”
Megjithatë, ekspertët dhe disa zyrtarë të inteligjencës mbeten skeptikë, duke theksuar se sulmet kanë ndikuar vetëm përkohësisht programin bërthamor iranian dhe nuk kanë shkatërruar plotësisht kapacitetet e Teheranit.
Hetimi i nisur nga Sekretari i Mbrojtjes synon të gjejë burimin e rrjedhjes së informacionit, një ngjarje që sipas zyrtarëve mund të dëmtojë besueshmërinë dhe sigurinë e agjencive amerikane të inteligjencës.
