Nënkryetarja e PDK-së, Vlora Çitaku, thotë se bllokada e Kuvendit për herë të 37-të vjen si pasojë e kryeneçësisë së LVV-së.
Sipas saj, situata e krijuar politike është e papranueshme.
“Sërish ishim dëshmitarë të shpërfaqjes së papërgjegjësisë politike, qytetare të subjektit të parë të partisë fituese, kjo situatë e kjo gjendje është tërësisht e papranueshme. Mirëpo, në këtë pikë të bllokadës jemi si rezultat i kryeneçësisë dhe papërgjegjësisë së LVV-së dhe Albin Kurtit”, tha ajo para gazetarëve.
Deputetja e PDK-së, i bëri thirrje kryetarit të VV-së niherit edhe kryeministri në detyrë, Albin Kurti që të “reflektojë”.
“Madje, dëgjojmë edhe deklarime qesharake, ku gjoja i kanë numrat për ta formuar qeverinë, por nuk i paskan numrat për kryeparlamentare. Kjo situatë nuk do koment. I bëjmë thirrje kryetarit të VV-së, që të reflektojë. Kosova është më e madhe dhe shumë më e rëndësishme se egoja e tij”, deklaroi ajo.
Ka dështuar këtë të mërkurë edhe tentativa e 37-të për konstituimin e Kuvendit të Kosovës.
Propozimi i ardhur nga Lëvizja Vetëvendosje që kryeparlamentari të zgjidhet përmes votimit të fshehtë, sërish nuk ka gjetur përkrahje nga partitë opozitare.
PDK, LDK, AAK dhe Lista Serbe kanë refuzuar të propozojnë përfaqësues për formimin e komisionit ad-hoc për votim të kryetarit të Kuvendit. Nga 92 deputetë sa ishin të pranishëm në sallë 52 deputetë votuan pro, kundër asnjë, ndërsa abstenim nuk kishte.
Seanca e rradhës do të mbahet pas 48 orëve, pra të premten e 27 qershorit nga ora 11:00./teve1.info/
