Drejtori i Inspeksionit në Komunën e Prishtinës, Florian Dushi, ka thënë se vendimi për rrënimin e tarracave, të cilat zënë një pjesë të sheshit, është marrë nga kryetari Përparim Rama.
“Është një proces që është duke vazhduar për disa ditë me radhë, është vizion edhe vendim i kryetarit Rama për të liruar sheshin nga konstruksionet të cilat e kanë zënë një pjesë të madhe të sheshit e të cilat janë pa leje aty, pa pëlqim të organeve kompetente. Ne si drejtori e Inspeksionit natyrisht kemi komunikuar më të gjitha bizneset që janë në shesh dhe mbi kurriz dhe shumica prej tyre kanë marrë përsipër që t’i largojnë vetë”, ka thënë ai për EO-në.
Sipas Dushit, një pjesë që kanë refuzuar për t’i larguar vetë, i ka larguar komuna përmes kompanive të kontraktuara.
Ai ka thënë se kjo iniciativë është marrë pas ankesave të shumta të qytetarëve.
“Nuk është i lehtë shkatërrimi i një konstruksioni që është ndërtuar, ajo u merr kohë punëtorëve. Po si proces po e shohim se pjesa më e madhe duke filluar prej Kuvendit të Kosovës e teposhtë, tashmë janë liruar dhe do të përfundojnë për një kohë shumë të shkurtër në të gjithë sheshin. Është prioritet për shkak të ankesave të mëdha që qytetarët i kanë shprehur pasi hapësira lëvizëse e tyre është ngushtuar”, ka thënë ai.
