Shenjat e gjakut kanë mbetur në vendin e ngjarjes.
Në oborrin e Gjykatës në Suharekë, dyshohet që H.K., sulmoi me një mjet të fortë personin tjeter B.B., me të cilin po hynin në brenda në objekt.
Aty pritej të mbahej shqyrtim gjyqësor ndaj tyre për një incident në shkurt ku i dëmtuar ishte i pandehuri i sulmit të sotëm.
“Në hyrjen e oborrit të Gjykatës, kur palët po hynin (pa kaluar kontrollin e sigurimit dhe kontrollit fizik), pala H.K., ka nxjerrë një mjet të forte nga çanta e tij, dhe sulmon personin B.B.,. Në ato moment ka reaguar edhe sigurimi fizik i Gjykatës, (të cilët ndodheshin brenda objektit të Gjykatës), dhe kanë ndaluar konfliktin dhe menjëherë është lajmëruar Policia e Kosovës, e cila ka vazhduar me procedurën hetimore, dhe palës që ka pësuar lëndimet i është dhënë ndihma mjekësore, derisa kanë arritur ekipet e emergjencës”, thuhet nga Gjykata Themelore në Prizren.
Rastin e kanë konfirmuar edhe Policia e Kosovës.
Derisa Prokuroria Themelore në Prizren njoftoi për caktimin e masës ndaj tij.
“Me urdhër të Prokurorit të Shtetit është ndaluar për 48 orë personi me inicialet H.K., për shkak të dyshimit të bazuar se ka kryer veprën penale ‘Lëndim i rëndë trupor’, sipas nenit 186 paragrafi 3, të Kodit Penal të Republikës së Kosovës (KPRK). Brenda afatit të paraparë ligjor, Prokuroria do të ndërmarrë të gjitha veprimet e nevojshme procedurale në përputhje me legjislacionin në fuqi”, thuhet mes tjerash.
Viktima u dërgua për trajtim në Emergjencën e qytetit, ku për lëndime dha detaje mjeku i kësaj klinike.
Po ashtu nga Gjykata Themelore u tha se janë në koordinim të plotë me Policinë për zbardhjen e rastit.
