Kryeministri në detyrë, Albin Kurti, me ftesë të ambasadorit të Finlandës në Kosovë, Matti Nissinen pati sot një drekë pune të përbashkët ambasadorin e Suedisë, Jonas Westerlund, ambasadoren e Holandës, Karin Boven, ambasadorin e Belgjikës, Grégoire Cuvelier dhe shefin e misionit në Ambasadën e Luksemburgut, Eric Dietz.
Zyra e Kryeministrit ka bërë të ditur se në takim është diskutuar rreth zhvillimeve të fundit në vend.
“Diskutuan bashkë rreth zhvillimeve të fundit në vend, përfshirë procesin e konstituimit të Kuvendit dhe formimin e institucioneve të legjislaturës së nëntë, dhe tema tjera me interes në kuadër të komunikimeve dhe shkëmbimeve të rregullta ndërmjet Qeverisë dhe shteteve partnere”, thuhet në njoftim.
Tutje, thuhet se Kurti ka shprehur mirënjohjen e tij për raportet e mira dhe për mbështetjen e vazhdueshme të këtyre shteteve ndaj Kosovës, siç thuhet, sidomos në proceset integruese në Bashkimin Evropian dhe NATO.
