Komiteti për Mbrojtjen e Gazetarëve (CPJ) tha se ishte “i tmerruar” nga sulmi i Izraelit në studion e kanalit televiziv shtetëror të Iranit në Teheran të hënën.
“CPJ është e tmerruar nga bombardimi i kanalit televiziv shtetëror të Iranit nga Izraeli, ndërsa gazetarët ishin në transmetim të drejtpërdrejtë”, tha drejtoresha e saj rajonale për Lindjen e Mesme dhe Afrikën e Veriut, Sara Qudah.
“Vrasja pa u ndëshkuar nga Izraeli e të paktën 185 gazetarëve në Gaza e ka inkurajuar atë që të shënjestrojë mediat diku tjetër në rajon. Kjo gjakderdhje duhet të marrë fund tani”, shtoi ajo, shkruan agjencia e lajmeve CNN.
Sulmi i Izraelit në studion e kanalit televiziv shtetëror, IRINN, ndërpreu një transmetim të drejtpërdrejtë nga prezantuesja Sahar Imani, e cila po raportonte mbi sulmet e vazhdueshme ndaj Iranit.
“Dëgjoni, ajo që dëgjoni është zhurma e agresorit”, tha Imani në transmetim para sulmit, sipas deklaratës së CPJ-së.
Të paktën dy persona u vranë në sulm, raportoi agjencia shtetërore e lajmeve e Iranit, IRNA.
