Asambleja e Përgjithshme e OKB-së miratoi të enjten një projektrezolutë duke u bërë thirrje shteteve anëtare të marrin të gjitha masat e nevojshme për të siguruar që Izraeli të përputhet me ligjin ndërkombëtar.
Rezoluta, e cila gjithashtu thekson situatën e rëndë humanitare në Palestinë, vuri në dukje nevojën për llogaridhënie për të siguruar që Izraeli të respektojë detyrimet e ligjit ndërkombëtar.
E paraqitur nga Spanja së bashku me më shumë se 30 shtete të tjera, rezoluta u mbështet nga 149 vende, me 12 vota kundër dhe 19 abstenime.
“Si çështje urgjente, bashkësia ndërkombëtare duhet të lëshojë një mesazh të fuqishëm, një mesazh në lidhje me situatën në Gaza, dhe ne i inkurajojmë fuqimisht të gjitha shtetet anëtare të votojnë në favor të kësaj projekt-rezolute”, tha para votimit i dërguari i Spanjës në OKB, Hector Gomez Hernandez.
Hernandez vuri në dukje se projektrezoluta theksonte angazhimin për zgjidhjen me dy shtete, ndërsa “hedhte poshtë me vendosmëri çdo përpjekje për ndryshim demografik në Rripin e Gazës dhe Bregun Perëndimor”.
“Teksti kërkon gjithashtu ndalimin e menjëhershëm të vendbanimeve, ndërtimit, zgjerimit, konfiskimit të tokës, prishjes së shtëpive, dëbimeve me forcë dhe dhunës së kolonëve në Bregun Perëndimor, përfshirë Jerusalemin Lindor”, tha ai.
Përpara votimit, i dërguari palestinez në OKB, Riyad Mansour, e përshkroi formulimin e projektrezolutës si “më të fortën deri më sot për këto çështje”.
“Shpërfillja e vazhdueshme dhe përbuzja e hapur e Izraelit për rregullat e së drejtës ndërkombëtare, rezolutat e organeve të OKB-së dhe qëndrimet e shteteve anembanë botës duhet të çojë në përkthimin e kësaj gjuhe në veprime të vendosura, dhe kjo duhet të bëhet tani”, tha Mansour.
Duke argumentuar se rezoluta “dënon fuqimisht çdo përdorim të urisë së civilëve si metodë lufte dhe mohimin e paligjshëm të aksesit humanitar”, ai tha se ajo gjithashtu “thekson detyrimin për të mos i privuar civilët” nga nevojat e tyre themelore për mbijetesë në enklavë.
“Asnjë armë, as para, as tregti për të shtypur palestinezët, për t’i spastruar etnikisht dhe për t’u vjedhur tokën. Përdorni mjetet që keni në dispozicion”, kërkoi ai.
E ngarkuara me punë e përkohshme e SHBA-së, Dorothy Shea, e quajti seancën e jashtëzakonshme mbi Palestinën “një tjetër dështim nga ana e Kombeve të Bashkuara për të dënuar Hamasin”.
Duke argumentuar se projektrezoluta “dërgon një mesazh të papranueshëm”, Shea tha se SHBA-të nuk mbështesin “masa të njëanshme që nuk dënojnë Hamasin. Ne nuk do të mbështesim rezoluta që nuk bëjnë thirrje që grupet terroriste të dhunshme të çarmatosen dhe të largohen nga Gaza dhe që nuk njohin të drejtën e Izraelit për t’u vetëmbrojtur”.
Ajo gjithashtu pretendoi se kjo “nuk bën asgjë për të sjellë qetësi në Gaza” dhe se “gjithashtu nuk bën asgjë për të çuar përpara një zgjidhje diplomatike realiste për të çuar më tej kauzën e paqes. Është plot me defekte serioze”./AA
