Spekulimet për një sulm izraelit ndaj objekteve bërthamore të Iranit kanë qarkulluar prej vitesh, por ato janë intensifikuar ndjeshëm në ditët e fundit.
Izraeli ka kryer një sulm me afër 200 avionë ushtarak gjatë mbrëmjes kundër Iranit.
Izraeli është i shqetësuar se bisedimet midis SHBA-së dhe Iranit (të cilat po zhvillohen që nga prilli) për një marrëveshje të re bërthamore mund ta lënë Iranin me një program bërthamor – diçka që Izraeli ka thënë se nuk mund ta pranojë në asnjë formë.
Prej vitesh, Izraeli ka paralajmëruar për atë që e sheh si një kërcënim ekzistencial nga programi bërthamor i Iranit. Kryeministri izraelit Benjamin Netanyahu e ka pasur këtë si një temë të vazhdueshme që nga mesi i viteve 1990, shkruan BBC.
Irani vazhdimisht ka mohuar se po synon të zhvillojë armë bërthamore, duke këmbëngulur se programi i tij bërthamor ka qëllime paqësore dhe civile.
Por fuqitë perëndimore dhe Agjencia Ndërkombëtare për Energjinë Atomike (IAEA) nuk janë të bindura për këtë. Të enjten, IAEA miratoi një rezolutë – për herë të parë pas 20 vitesh – duke deklaruar se Irani është në shkelje të detyrimeve të tij bërthamore.
Duke folur ndërsa sulmet kishin nisur, Netanyahu tha se Irani ka prodhuar material të mjaftueshëm për – teorikisht – nëntë bomba bërthamore, diçka që përputhet me një vlerësim të fundit të IAEA-s. Sipas tij, Irani përbën kërcënim për “vetë mbijetesën” e Izraelit.
Duket se, duke vendosur të sulmojë tani, Izraeli po shfrytëzon një moment të përshtatshëm: Irani ende nuk i ka rindërtuar sistemet e mbrojtjes ajrore të dëmtuara nga një sulm izraelit në tetor – dhe një sulm tani do të paraprijë raundin e radhës të bisedimeve bërthamore, që pritet të zhvillohen të dielën.
