Në Qendrën e Njësive të Specializuara në Vrellë, të mërkurën është mbajtur ceremonia e dorëzim-pranimit të poligonit të gjuajtjes dhe poligonit me pengesa, rishtazi të rinovuar nga ushtarët profesionalë të KFOR-it, përfshirë ushtarët amerikanë.
Në këtë ceremoni kanë marrë pjesë përfaqësues të lartë të Policisë së Kosovës dhe përfaqësues të lartë të KFOR-it, përfshirë drejtorin e Përgjithshëm të Policisë së Kosovës, kolonel Gazmend Hoxha, përfaqësuesin e Shtabit të Përgjithshëm të KFOR-it kolonel Ferrara, komandantin e KFOR-it amerikan kolonel Helzer si dhe kolonel Mentor Shabani, drejtor i Departamentit të Njësive Speciale.
Drejtori i PK-së, kolonel Hoxha dhe komandanti i KFOR-it amerikan kolonel Helzer, theksuan se bashkëpunimi dhe koordinimi i aktiviteteve ndërvepruese si dhe përkrahja dhe mbështetja në fusha të ndryshme teknologjike e logjistike, siç janë edhe poligoni i gjuajtjes dhe rinovimi i poligonit me pengesa, ndihmojnë në realizimin e detyrave, trajnimeve dhe aktiviteteve policore, në interes të ruajtjes së rendit e sigurisë publike si dhe ofrimit të sigurisë ndaj të gjithë qytetarëve pa dallim.
“Drejtori Hoxha dhe koloneli Helzer, në shenjë mirënjohje për përkrahje dhe bashkëpunim të ndërsjellë institucional, shkëmbyen nga një pllakatë, ndërsa në shenjë falënderimi ndanë mirënjohje edhe për ushtarët e kontingjenteve të shteteve të ndryshme, si dhe për zyrtarët e Njësive Speciale të Policisë së Kosovës, për punën dhe kontributin e tyre të përbashkët në renovimin e poligonit. Kjo dëshmon bashkëpunimin e shkëlqyer që Policia e Kosovës ka me KFOR-in, bashkëpunim ky i cili ndikon në paqen dhe sigurinë e vendit”, thuhet në komunikatë.
