Kryeministri në detyrë, Albin Kurti ka reaguar për arrestimin e ish-policit, Arbnor Spahiu nga autoritetet serbe në pikën kufitare në Hungari-Serbi.
Kurti ka thënë se institucionet e Kosovës janë angazhuar maksimalisht që ai të lirohet sa më parë.
Derisa, ai ka shtuar se sjellja jonormale e Serbisë ndaj qytetarëve të Kosovës, nuk duhet dhe nuk do ta pranon të normalizohet.
“Prej momentit të arrestimit të shtetasit tonë, Arbnor Fatmir Spahiu, nga autoritetet serbe në pikën kufitare Hungari-Serbi, institucionet tona janë angazhuar maksimalisht që ai të lirohet sa më parë. Sjellja jonormale e Serbisë ndaj qytetarëve të Republikës së Kosovës, nuk duhet dhe nuk do të pranojmë të normalizohet”, ka reaguar Kurti.
Ndryshe, Arbnor Spahiu ish-pjesëtar i Njësisë Speciale të Policisë së Kosovës, u ndalua më 7 qershor në pikën kufitare Serbi-Hungari, teksa po udhëtonte me familjen nga Austria.
Sipas MPJD-së, ai ndodhet në paraburgim 30-ditor në Suboticë, i akuzuar për rastin e Banjskës – akuza që familja dhe mbrojtja i quajnë të pabazuara.
Ambasadori Jetish Jashari dhe avokati Arianit Koci do të vizitojnë Suboticën më 11 qershor.
Ndërkohë, është dorëzuar kërkesa për vizitë në qendrën e paraburgimit. Rasti është bërë i ditur edhe misioneve të Quint-it dhe trupit diplomatik në Kosovë./teve1.info/
