Avokatët e Sean “Diddy” Combs kanë kërkuar zyrtarisht që procesi gjyqësor ndaj tij për trafikim seksual të shpallet i pavlefshëm, duke akuzuar prokurorinë për shkelje serioze dhe manipulim të provave.
Në një letër drejtuar gjykatës më 7 qershor, mbrojtja pretendon se prokuroria ka paraqitur dëshmi të pavërteta, të cilat “e dinte ose duhej të dinte se ishin të rreme”.
Në qendër të debatit është një incident i vitit 2016, ku Diddy akuzohet se ka varur Bryana Bongolan nga ballkoni i apartamentit të këngëtares Cassie Ventura.
Sipas mbrojtjes, Cassie – që dëshmoi se e kishte parë ngjarjen me sytë e saj – në fakt nuk mund ta ketë qenë dëshmitare, pasi sipas komunikimeve të saj në atë kohë, ajo mësoi për incidentin vetëm pasi kishte ndodhur.
Për më tepër, avokatët e Diddy-t sfidojnë vërtetësinë e fotove të dëmtimeve të Bongolan-it, të datës 26 shtator, duke theksuar se ato janë marrë në Los Angeles, ndërkohë që artisti ndodhej në New York.
Mbrojtja i cilëson këto veprime si një përpjekje për ta paraqitur Combs si një person të dhunshëm dhe të rrezikshëm, duke kërkuar pezullimin e menjëhershëm të procesit gjyqësor për shkak të shkeljeve të rënda të etikës nga ana e prokurorisë.
Procesi kundër Diddy-t mbetet në vëmendjen e opinionit publik, mes përplasjeve ligjore dhe pretendimeve që tronditin botën e industrisë së muzikës.
