Rihanna, këngëtarja dhe sipërmarrësja e njohur botërisht, ka pësuar një rënie të ndjeshme në vlerën e saj neto, sipas listës më të fundit të “Forbes” për “Gratë më të pasura që e kanë ndërtuar vetë pasurinë në SHBA”.
Pasuria e saj është vlerësuar aktualisht në 1 miliard dollarë, një rënie prej 29% nga 1.4 miliardë që ishte më parë.
Kjo rënie vjen pavarësisht suksesit të qëndrueshëm të markës së saj të njohur të bukurisë “Fenty Beauty”, e cila vijon të jetë një emër i fuqishëm në industrinë globale të kozmetikës.
Sipas “Forbes”, vështirësitë e brendshme në disa nga bizneset e saj, përfshirë markën e të brendshmeve “Savage X Fenty”, kanë ndikuar negativisht në të ardhurat e përgjithshme.
Një nga zhvillimet kryesore ishte largimi i CEO-së së “Savage X Fenty” në gusht të vitit 2024, i cili u transferua për të drejtuar “Victoria’s Secret”.
Ky ndryshim udhëheqjeje besohet se ka ndikuar në performancën e markës së brendshmeve të Rihanna-s.
Edhe pse “Fenty Beauty” u zgjerua në tregun kinez në partneritet me gjigantin “LVMH”, mungesa e një rritjeje të fortë në shitje ka kontribuar në rënien e vlerës së pasurisë së Rihanna-s.
Pavarësisht sfidave, Rihanna renditet e 35-ta në listën e grave më të pasura të “Forbes”, duke qëndruar përkrah emrave të mëdhenj si Oprah Winfrey, Beyoncé, Kim Kardashian, Serena Williams dhe Taylor Swift.
Rihanna vazhdon të jetë aktive në industrinë e modës dhe kozmetikës.
Në muajin prill, “Savage X Fenty” prezantoi një koleksion nusërie, ndërsa “Fenty Beauty” riktheu në treg produktin e njohur “Body Lava”, i cili u lançua pikërisht në kohë për sezonin veror.
