Kreu i PDK-së, Memli Krasniqi, ka zhvilluar sot një takim me përfaqësues të organizatave të shoqërisë civile, me të cilët ka diskutuar rreth situatës aktuale politike në vend. Në fokus të bisedës ishte bllokada institucionale që ka hyrë në ditën e saj të 116-të.
Krasniqi ka theksuar se kjo bllokadë është rezultat i, siç tha ai, paaftësisë dhe mungesës së vullnetit nga ana e koalicionit fitues për të mundësuar konstituimin e Kuvendit të Kosovës.
Ai ka shtuar se PDK-ja është e shqetësuar për këtë situatë, e cila, sipas tij, po dëmton funksionimin demokratik dhe po vë në rrezik serioz të ardhmen institucionale dhe ekonomike të vendit.
“PDK ka vepruar me përgjegjësi duke ofruar një zgjidhje reale dhe të zbatueshme për daljen nga kriza – përmes propozimit për ndërrimin e kandidates aktuale, si mundësi konkrete për konstituimin e Kuvendit dhe ecjen përpara drejt themelimit të Qeverisë së re, brenda afateve kushtetuese”, u shpreh Krasniqi.
Ai shtoi se vendi ka nevojë për institucione funksionale dhe lidership që vendos interesin e shtetit përpara atij partiak.
“Kosova ka nevojë për institucione funksionale, jo për kryeneqësi politike. Ka nevojë për stabilitet, jo për kriza. Dhe mbi të gjitha, ka nevojë për lidership që di të zgjedhë rrugën e shtetit, para interesave të ngushta partiake”, deklaroi ai.
