Kosovari me shtetësi amerikane, Lirim Sylejmani është dënuar me 10 vite burgim nga një gjykatë në Shtetet e Bashkuara të Amerikës, për pjesëmarrje në organizatën terroriste dhe grupin militant ISIS.
49 vjeçari, i njohur me emrin Abu Sulayman al-Kosovi e kishte pranuar fajësinë në dhjetor të vitit 2024, për pjesëmarrje në një tranim ushtarak me një organizatë terroriste.
Sipas aktgjykimit të gjykatës së Qarkut në SHBA, Sylejmani ka marrë pjesë në të paktën një betejë kundër Shteteve të Bashkuara të Amerikës.
Por, si filloi angazhimi i Sylejmanit me organizatën terroriste, ISIS?
“Në nëntor 2015, Sylejmani, një shtetas i natyralizuar amerikan që jetonte në Kosovë, udhëtoi për në Siri me familjen e tij për t’u bashkuar me ISIS. Pasi hyri në Siri, Sylejmani përfundoi procesin e pranimit në ISIS. Ai mori emrin Abu Sulayman al-Kosovi dhe u trajnua për t’u bërë ushtar me rekrutë të tjerë të ISIS. Trajnimi ushtarak i Sylejmanit përfshinte udhëzime se si të montohej dhe të qëllohej me një pushkë AK-47, si dhe si të përdorej një mitraloz PK, pushkë M-16 dhe granata”, thuhet në grafikë.
Sipas dosjes së Gjykatës, pas këtij ushtrimi, Sylejmani ishte caktuar në një batalion në Irak, ku kosovari ishte betuar për besnikëri ndaj udhëheqësit të ISIS, Abu Bakr Al-Baghdadi.
Në teren, i angazhuar me detyrë, Sylejmani doli në maj të vitit 2016, ku u caktua në batalionin në Mosul të Irakut, i armatosur me AK-47, katër karikatorë dhe dy granata.
Për shërbimet e tij, Sylejmani mori edhe pagesa nga ISIS.
Kur u shemb kalifati territorial i ISIS, Sylejmani bashkë me familjen e tij u zhvendos në juglindje të Sirisë.
Ai dhe familja e tij u kapën nga Forcat e Demokratike të Sirisë në shkurt të vitit 2019, ku një vit më pas, u transferua tek personeli i zbatimit të ligjit të Shteteve të Bashkuara, për t’u përballur me akuzat penale në Distriktin e Kolumbias.
Në disa raste, sipas Gjykatës, Sylejmani kishte folur publikisht në media për kohën e kaluar në ISIS.
Ai u hetua nga Task Forca e Përbashkët Kundër Terrorizmit e FBI-së.
