Presidenti amerikan, Donald Trump ka thënë të hënën se do të këmbëngulë që Teherani të çmontojë plotësisht programin e tij të pasurimit bërthamor si pjesë e çdo marrëveshjeje për të lehtësuar sanksionet shkatërruese.
Deklarata e tij duket se nënvlerëson një propozim të ofruar nga i i dërguari i tij i posaçëm në Iran, Steve Witkoff.
Trump dhe Witkoff, i cili po udhëheq negociatat për SHBA-në, kanë ofruar vazhdimisht mesazhe publike kontradiktore në lidhje me atë nëse Iranit do t’i lejohet të ruajë kapacitetin për të pasuruar uranium në nivele më të ulëta për qëllime civile.
Administrata Trump pohon se nuk do ta lejojë Iranin të zhvillojë një armë bërthamore.
Negociatat janë cilësuar nga Trump si shansi më i mirë i të dy vendeve për të shmangur konfliktin e drejtpërdrejtë ushtarak mbi programin bërthamor të Iranit.
Teherani, i cili mohon se kërkon armë bërthamore, ka këmbëngulur se nuk do të bjerë dakord për asnjë marrëveshje që e heq plotësisht programin e tij të pasurimit, ka raportuar AP.
“Sipas Marrëveshjes sonë të mundshme — NE NUK DO TË LEJOJMË ASNJË PASURIM TË URANIUMIT!”, shkroi Trump në rrjetet sociale.
Duke iu drejtuar kësaj kontradikte në dukje, një zyrtar i Shtëpisë së Bardhë tha se Trump po thoshte “të vërtetën e ftohtë dhe të hidhur”. Zyrtari tha se kushtet që SHBA-të u dhanë iranianëve ishin “shumë të ashpra” dhe do ta bënin të pamundur që ata të pajiseshin me një bombë bërthamore.
Postimi i Trump vjen pas raportimeve në media se propozimi i fundit i Witkoff-it drejtuar Teheranit do t’i lejonte Iranit të mbante nivele të ulëta të pasurimit për përdorime civile, si mjekësia bërthamore dhe energjia komerciale, nëse pranon të mbyllë vendet e tij nëntokësore të mbrojtura rëndë për një periudhë kohore.
SHBA-të dhe Irani janë angazhuar në disa raunde bisedimesh të drejtpërdrejta bërthamore për herë të parë në vite.
