Ka përfunduar me dëshmitarët e saj, javë më parë. Mirëpo, Zyra e Prokurorit të Specializuar, nuk ka kryer ende punë me provat. Pasi që kjo zyre ka dorëzuar disa raporte në rastin kundër ish krerëve të UÇK-së.
Por vetëm një pjesë e tyre janë pranuar nga trupi gjykues.
“Lidhur me rëndësinë e provave të propozuara, trupi gjykues vëren se ato përbëhen nga raporte të hartuara nga organizata ndërkombëtare në lidhje me ngjarjet në Kosovë që lidhen me akuzat. ZPS-ja mbështetet në provat e propozuara për të demonstruar, ndër të tjera: ekzistencën e një konflikti të armatosur gjatë gjithë periudhës së aktakuzës; një sulm të përhapur dhe/ose sistematik kundër popullsisë civile të kundërshtarëve”, thuhet në grafiken e ZPS-së.
Në mesin e provave të pranueshme për trupin gjykues janë edhe raportet e ekspertit të ADN-së, William Goodwin, që kishte dëshmuar në proces më 13 janar 2025.
Këto raporte, thuhet se lidhen me identifikimin e mbetjeve skeletore të viktimave të pretenduara që përmenden në aktakuzë, përmes analizës së ADN-së.
“Trupi gjykues është i kënaqur që raportet e ekspertizave i plotësojnë kërkesat e Rregullës 149 dhe janë të pranueshme në përputhje me Rregullat 138 (1) dhe 149”, thuhet tutje.
Bazuar në pranimin e këtyre provave, afati për mbrojtjen që të dorëzojë mocion për rrëzimin e akuzave, është shtyer për dy javë të tjera. Këto zhvillime, sipas avokatit Xhevdet Smakiqi, e zvarrisin gjyqin maratonik.
“Me siguri do të ndikojë në zvarritjen, prolongimin edhe më tutje të afatit për dorëzimin e parashtresave apo mocioneve që është duke përgatitur mbrojtja për rrëzimin e aktakuzës. Meqë jemi në shqyrtim gjyqësor ende dhe ky nuk është përmbyllur, në parim në procedurë penale por edhe tek Dhomat e Specializuara e aplikojnë që palët mund të dorëzojnë deri në mbylljen e tërësishme të shqyrtimit gjyqësor.”, ka thënë Smakiqi
2 qershori ishte caktuar fillimisht si data kur mbrojtja do duhej të dorëzonte mocionin për rrëzimin e akuzave, nëse nga prokuroria nuk do të dorëzoheshin prova të reja, çka do e shtyenin këtë afat për dy javë të tjera.
