Për disa vite e shoqëronte fëmijën e saj në shkollë.
Mimoza Rrahmani gjatë shkollës fillore ishte asistente e fëmijës së saj me aftësi të kufizuara.
Kjo për shkak të mungesës së këtyre punonjësve në institucionet arsimore.
E madje sipas Rrahmanit, ani pse në komunën e Fushë Kosovës janë punësuar disa asistentë, disa prej tyre e kanë ndërprerë punën.
“Është shumë sfiduese edhe pse tash po ka kuadro po përgatiten, është sfiduese, nganjëherë kur fillojnë punën e shohin se sa vështirë është. Por institucionet tona duhet t’i obligojnë derisa i përgatitsin dhe iu ofrojnë një punë të sigurt atëherë të jenë të përgjegjshëm. Kemi pasur raste në Fushë Kosovë, se edhe pas pranimit të asistentëve ata nuk e kanë vazhduar”, thotë Mimoza Rrahmani.
Nga Shoqata “Handikos” thonë se së fundi ka pasur një përpjekje për të rritur numrin e këtyre punonjësve të arsimit.
“Është evident edhe mungesa e asistentëve, apo mbështetësve nëpër shkolla ndonëse në pesë vitet e fundit është përllogaritur nga Qeveria e Kosovës, gjë që ka ndodhur për çdo vit. Pra janë angazhuar nga 100 asistentë në nivel të Kosovës, por ata i kanë shërbyer një pjesë e fëmijëve që janë të përfshirë. Shteti nuk është duke bërë asgjë për inkuadrimin e këtij 80% tjetër të cilët janë jashtë bankave shkollore”, shprehet Kaltrina Misini – zyrtare për informim në Handikos.
Se duhet të ketë një rritje të numrit të asistentëve e thotë edhe njohësi i arsimit, Rinor Qehaja.
“Rritja e numrit të asistentëve për fëmijët me aftësi të kufizuara është përgjegjësi institucionale dhe mbi të gjitha është detyrim ndaj fëmijëve për të garantuar një institucion të barabartë. Ajo çka është e rëndësishme përtej rekrutimit të numrit proporcional të asistentëve është edhe kompetenca e tyre e duhur profesionale për të ofruar shërbime të dinjetsëem dhe të barabarta për çdo fëmijë”,vlerëson Qehaja.
E në shkollat në Kosovë, sipas Ministrisë së Arsimit, aktualisht janë të punësuar 420 asistentë.
Ndërsa nga kjo Ministri kanë bërë të ditur se ky numër pritet të rritet.
“MASHTI ka paraparë punësimin e 500 asistentëve nëpër shkolla që pritet të punësohen nga komunat. Ata kanë përfunduar nivelin e V-të për asistentë të fëmijëve me nevoja të veçanta. Jemi në përgatitje të asistentëve të tjerë”, thuhet nga MASHTI-i.
Mungesa e asistentëve shihet si një faktorët e mosvijimit të procesit mësimore nga nxënësit me aftësi të kufizuara.
