Spanja dhe Sllovenia i bënë thirrje Bashkimit Evropian të enjten që të vendosë një embargo armësh ndaj Izraelit, të pezullojë marrëdhëniet tregtare dhe të vendosë sanksione shtesë kundër individëve përgjegjës për shkeljet në konfliktin izraelito-palestinez.
Kjo thirrje u bë gjatë një konference të përbashkët për shtyp në Madrid, ku kryeministri spanjoll Pedro Sanchez priti homologun e tij slloven, Robert Golob, për të shënuar njëvjetorin e njohjes së shtetit palestinez nga të dy vendet.
Sanchez theksoi nevojën për qëndrueshmëri morale dhe politike në qëndrimet ndërkombëtare: “Nuk mund të ketë standarde të dyfishta për Gazën dhe Ukrainën. Spanja dhe Sllovenia po tregojnë koherencë në mbrojtjen e të drejtave të njeriut në të dyja rastet.”
Kryeministrat u zotuan gjithashtu të flasin me zë të lartë kundër “shkeljeve flagrante dhe të përditshme të të drejtave të njeriut”, duke përmendur mbi 50,000 viktima nga ofensiva izraelite në Gaza, raporton Anadoly.
Ata theksuan nevojën për një zgjidhje të qëndrueshme me dy shtete, një armëpushim të menjëhershëm, lirimin e pengjeve dhe garantimin e ndihmës humanitare për popullsinë e Gazës.
Golob, nga ana e tij, e përshkroi situatën në Gaza si një “katastrofë” dhe shprehu besimin se bashkësia ndërkombëtare mund të luajë një rol të rëndësishëm në përfundimin e saj.
“Në qershor do të ketë disa takime të rëndësishme mbi këtë çështje. Shpresojmë që ato të sjellin ndriçim dhe lehtësim për popullin e Gazës,” tha ai.
Ndërkohë, ministri i Jashtëm i Spanjës, Jose Manuel Albares, njoftoi më herët këtë javë se Spanja dhe vende të tjera do të përdorin takimin e OKB-së më 16 qershor si një moment kyç për të promovuar njohjen ndërkombëtare të shtetit palestinez.
Në fund të konferencës, Sanchez komentoi edhe mbi një moment të fuqishëm emocional gjatë fjalimit të ambasadorit palestinez në Këshillin e Sigurimit të OKB-së të mërkurën. “Ishte një skenë prekëse për këdo që beson në të drejtën ndërkombëtare — ta shihje atë njeri duke shpërthyer në lot përballë indiferencës globale ndaj vuajtjeve të popullit të tij,” tha ai.
